Дида бичIчIуларо, дуда бичIчIулищ

26 июля 2016 - admin
article904.jpg

 

Дида бичIчIуларо, дуда бичIчIулищ,
Нилъ цIунун ругел куц, Конституциялъ.
Кире рилъаниги, щекъер къай гуреб,
Мукъуликъги ккола, "куда лезешь?"-ан.

 

Баркула календарь, красный къо дуда,
Каву рагьун къватIир, рахъа сверизе.
ЗухIмат-кеп букIина, концертал кьела,
Кинабго лъугIидал, рощнол гохI тела.

 

Дида бичIчIуларо, дуда бичIчIулищ,
Конституциялъе цо къо щай кьураб.
Жакъа дун цIунулев, метер зурулев,
Закон инсанасде данде хIалтIулеб.

 

ХIарам батIулалда, тIад галиги чIун,
ХIалал колбасагун, коньяк гьекъолел.
Гьеб гьабулев инсан, басурман гуриш,
Бадир хъатал чIванин, нилъ рихьулариш..

 

Дида бичIчIуларо, дуда бичIчIулищ,
Баркизе кин кколеб, Конституция,
Кинаб ритIухълъидуй, бетIер къулилеб,
КъотIун реханани, нахъе кьолареб.

 

Рилъаха ралъдахъе, гьогьоми чIвазе,
Гьайбатаб Каспийдулъ, копой чвердезе.
Котеджал рихьула, Виллаби руго,
Рахъуге ле хьитал, лъадахъ щвелалде.

 

Щайха гьикъулареб, гьал хъулби лъилан,
Хъутаналда вугев, вехь ватиладай.
Доярка рогьалилъ гIака бечIулей,
БагIар чугIил икра, кунев депутат.

 

Дида бичIуларо, дуда бичIчIулищ,
Районазда гьечIеб, Конституция.
Киналго бутIрулги, тIадчагIи, чукъдул,
Эхер щай ахIулел, МахIачил шагьар.

  

Ленинил памятник, пачалихъ мина,
Майдан сверун къараб, къуватаб аскар.
Мискинчи чIухьги бан, кусбиги хъирщун,
Хъулухъчи мандатгун, хъатир адабгун.

 

Дида бичIуларо, дуда бичIчIулищ,
Байрахъал рорхарал, рагъда бергьунищ.
Ракъуца холезул, хивал цIикIине,
ЦIикIун багьа бугеб, ярмарка гIуцIун.

 

ГIицIго шагьаралда, щай гьаб, байрам къо,
Районазул бутIрул, батIаги ахIун.
"БестIал лъималазда", лъазе толареб,
Балъгояб батила, бицине хабар.

 

Дида бичIчIуларо, дуда бичIулищ,
Рищиял ругелъул, бадисан раккун.
"Цогояб Россия" нагагь къанани,
Къавуда рещтIунеб, Дерьмократия!.

 

Дий росулъ хинкI буго, ххузе ридиги,
Хважаинги вуго, дирго напсалъул.
Дица баркиларо, Конституция,
Карандаса горде, дир кколеб закон.

 

Зазда хIанчIи гIадин, хIулхIулел рукIа,
ХIаким, хIакимасул, хIатIал чIикIулел.
ХIаким хвараб къоялъ, къай чIегIер чIинчIо,
ЧIухIарал михъазда.бахъе далак нус.

 

Дидаги бичIчIула, дудаги лъала,
Дуеги лъикI буго, дийги квеш гьечIо.
Конституциялъул кверщел кодосев,
Киназего гурев, АГАРАВ вугев.......

 

Адам Аварав

 

 

 

 

Рейтинг: 0 Голосов: 0 1127 просмотров

Нет комментариев. Ваш будет первым!