Лъалароха хIаким…

2 сентября 2017 - Адам Аварав
article1142.jpg

 

Adam Avarav

 

01.09.2017 г.  03:37 

 

Борхатаб къаркъала къуват бугеб черх,
Къурбан хъвезе вахъа, хъахIлъи реханин.
Хъулухъалъ мун цIунун, цIеца теларо,
Тахидаги кIусун сиратI инаро....

 

Берал гIодор риччай нечанин ккезе,
Бикъанщинаб гIарац, гIалам гуккараб..
ГIодулеб ххвел гьабе, гьа бай тавбугун,
Толарин Аллагьас гьеб бецIичIого..

 

ЦIеца вухIиларин хIамабагьадур,
ХIинкъи гъорлъа арав.ургъе гъулухьго.
Гъоба букIунеб жо жакъа лъаларев,
Лъалеца бицина, цинги кантIила.

 

Кабинетги рахан нухда гали лъе,
Бох бекизе гурин гвандинивги ккун.
Откатал гьечIого, гьабичIеб хIалтIи,
ХIащулъ хIетIеги чIун, речIизе гIодов...

 

ГIарасс майданалда дуйго букIунеб ,
Диваналъул согIлъли салават битIе.
Сси борхун хьвадарав, хьолболъги тункун,
Тараб дуца уммат эниб кIал гьикъун.

 

Гьаниб бигьа буго букIинарилан,
Бихьизе кьун бугеб кьер бугеб дунял.
КьогIал гIазабазе гIанкъраби тIамун,
ТIун унеб дур гьанал гьабе цебе чIей.

 

ИчIкIалал рукIунин борхьал рачIунин,
Хьимулев жанисан жеги лъаларин.
Лъела молода мун.мусруги жемун,
Джипалда рекIарав кIвеладай лъелго .

 

Лъалароха хIаким, хIакъ, хIакъикъ хъунан,
ХъвагIан рацIинадай, цIогь, дур мунагьал.
Мажгиталде вачIун, чIваниги нодо,
ЧIелев Нукар Накир, кин щиб кIал гьикъун.

 

Къуватги бугилан, буголъи щванин,
Щайда балагьула берзуй гIечIого,
ГIарацги цIикIунан, цIайи борхунан,
ЦIуниладай гьалмагъ гьеб охранаялъ..

 

Автомат аниб тун, тункIил хъундагъалъ,
Туризе гьавилищ, гьаб туснахъалда,
Нахъа кватIилалде, тIубан вусине,
Судалъ хIукмо къотIун , къачIай жаниве.

 

Жеги кватIун гьечIо кантIе бокьани,
Капаратги бахъе, хъулухъги рехе.
Хъубаб ракI бацIине, цIале къулгьаби,
Гьаб гуреб батIияб тIокIаб нух гьечIин.

 

ЧIоге нагIадги ккун, квеш букIун бичIун,
ЧIукнаяб дур гIамал гIунин халкъалъе.
Хадуб хъвезе жоги жакъаго ургъе,
Гъарим гурищ гьебги, гьир мун ваччизе..

 

 

Рейтинг: 0 Голосов: 0 278 просмотров

Нет комментариев. Ваш будет первым!

Яндекс.Метрика