Рилъале сверизе, гIодоб къо бугин

26 сентября 2016 - admin
article962.jpg

Адам Аварав

 


 

 

 

Рилъале сверизе, гIодоб къо бугин,
ГIагараб шагьаргун лъай хъвай гьабизе,
Щвела майданалде, Ленин вихьила,
Хьулдарулел тарал тезисал лъала.

 

Вокзалалде ина, МахIач ватила,
Хундул чурулареб, чодаги рекIун.
Чи хадув кIалъазе кIолеб замана,
БачIанин рагIанин, рещтIинищ гъоркье.

 

Ралъдахъе рилъина, хъублъи батила,
Хъватаби чурараб чорок махI чIвала.
Чамги магIарулалъ магIу тIинкIараб,
ТIаде сали хъвараб урхъи цIехела.

 

ГIорхъаби рахунел рорхатал гуми,
Гандурасаз ричун чидакъ хутIараб.
Херав капитанас кверал хьвагIараб.
Кидаяли гучаб причал данд чIвала.

 

Вокзалалда кIусун соролел квераз,
Шагьаби рикIкIуней кIодо ятила.
КIусун чемодангун чиякъ хутIарай,
Чвахун магIу тIолей тIанчIихъ ххал кквела.

 

ТIоцебесеб рокьи, доб Улубил къватI,
Къадада мугъ цвила цалазул лазат.
Те дунан абулей, убач хирияй,
Хурхунеб доб сордо, сорола лугбал.

 

Сверизе рилъина, Родоп бульвар ккун,
Больгаралгун нилъер. лълъугIараб гъунки,
Гъоба оркестраялъ бачунеб макъан,
Къасде цебе чIела, Совет хIукумат.

 

Симфония буго багъулеб гIинда,
ГIадамал киб араб, Филармония. . .
Фазуги, Расулги, Дакуги хвана,
Хадуб хъваяб дунял, дунгоги ина.

 

Авар поэзия, Дом писателей,
Мискинго бихьула, тIахьал хьухьикьан,
Хьул лъунщинаца, щедевралги хъван,
Щивасе памятник, поэт классикан.

 

Кинха бугеб жакъа, къвакъвалеб зурма.
МагIарул театр, гIадамал цIехон.
ЦIияб щибха лъураб, лъаларо ХIамзат,
КIодоласул ригьин рагьула пардав.

 

Дие щив вокьилев. Щекспир вокьила,
Щвалде щвезе махщел, магIарул артист.
Те режиссер живго, жея директор,
Дурго тIадаб хъулухъ, хъатир цIунизе.

 

Хъалаби ран руго, Пушкинил къотIнор,
Къваридаб залалъуб, кьурдун "Лезгинка"
Заремаца лълъутIун, тIад ругез лълъукъун,
Огь къиямасеб къо, дир маданият.

 

ЛъугIана гъоркь базар, гъурана гьаб цо,
Цинги вертолеталъ гьабуна тIавап.
ТIолалго рачине, нечон ратила,
Чурхъе хутIаралин, тIамуна михъич.

 

Чам бакIха букIараб, ракI свакан буго,
Сверизе рахъинин, нахъисеб къоялъ.
Сардилал кIалкIучIал, кIечIолел роцал,
Рихьизе рачина, бичас биччани.

 

Нагагь хIажат гьечIин, хIинкъаби кьуни,
ХIалицаго ина, изну гьечIого.
Аллагьас квер бакъун, капкалги кьуни,
Киноги бахъила. рахъизе ракIал.

 

РачIа гIодор чIелин, рагIдукь гьаб гъотIокь,
Гъарим щив пакъирас, гьаб чIун букIараб.
Баркала гуребги, кириги буго,
Кив мун ватаниги. мунагьал чурад !!!

 

Рейтинг: 0 Голосов: 0 1215 просмотров
Авар ТВ # 3 октября 2016 в 18:15 0
http://avarpoeziya.ru/archives/799Адамил куч1дул авар поэзия сайталда