ВачIа магIарухъе, ГIабдулхабиров

27 февраля 2017 - Администратор
article1056.jpg

 

 Адам Аварав


ВачIа магIарухъе, ГIабдулхабиров,
ГIелародай Москва,свакан гьечIищ мун?
Соболареб черхги
чарамул гурин,
Чи
чиясе бацIлъун бецIулеб халкъги.

Харадунив вахъун хъамизе гьород,
Гьелде данде кIущун щаян кколарищ?
Щварал тIиралабаз тIаждал гIаг биччун,
Нечеян ахIтIезе,хIал хъубал лъугьун.

ЛъугIулареб хабар, холарев пача,
Хисизе хIадурун досул цоги вас.
Цигун гени кванан кинха бергьинел?
Баччун цIалкIуялъ лъим лъие гьеб гIелеб?

ГIанкIудай бижана хонодай цебе?
Цинги гьелъий жаваб жеги батичIеб.
Травматолог гурин хирургин хIажат,
Турараб бецаб бакь кьурун бахъизе.

Кьурдулел рихьичIищ хьитал протезал?
Пащманго гIенекун гIинкъасе лазат.
ГIансаги кодоб ккун нухлул рагIалда,
МагIу бацIунаго дол цIороберал.

Басрияб цIулалъул цIияб гъалдибер
ЦIидасан ургъизе велосипед щай?
Щивилан гьикъулев мукъуликъ кколев?
Караулас унеб Алагьас кьун рухI.

МахIамад бахIсал щай бахIарав гурин,
"МахIу беканиги галадуларев".
ХIинкъунилан дуда дагIба лъил ккелеб?
КантIуларев чияс чан рекIкI ургъулеб?

Агъвалисан тIаде тIокIаб щвечIони
Машина кIваричIо лъелго рилъина.
Лъоб дуе бокьулеб кьурул рагIалда,
МагIарул Гимн ахIун хIалхьи гьабила.

Гьакварире щведал щагIил хъаба цIун,
ГьоцIо цебе лъела дуда вацгIалас
ГIодоб речIун чахъу хъвелалде цебе,
ЯцгIалалъ бачIина мачIгояб рахь, чед.

Чучуларев лъала лъида, щиб бицун,
Цигун гугаризе ургу тIамун щай?
Инсул заниялде зигарди гуреб,
Зиярат букIана вукIинин къвакIун.

Къаси сордо буго сихI къотIи буго
Сунареб цо чирахъ дур Москваялда.
Мун пикрабалъ вуго, кватIулел ругин,
КантIе нуж халкъилан хитIаб ургъулев.

 

 

Рейтинг: 0 Голосов: 0 789 просмотров

Нет комментариев. Ваш будет первым!

Яндекс.Метрика